المشكلة إنها بتقطع فجأة وبدون أي مقدمات
يا ترى ايش هي اللي بتقطع بدون أي مقدمات ؟؟
أكيد مش السكينة
وأكيد مش أم أحمد بتقطع الشارع
تلاقيها قاعدة بتقطع بأواعيها من زود الهم :)
اللي بتقطع بدون أي مقدمات هي الخالة إم الماتور الكهربا أخت ابن خال أبوسولار ومرتو للعتمه .
الخالة كهربا اليوم زارتنا الضهر معاد الغدا ع ال2 ونص تقريباً أكلت وشبعت ومالحقت ترتاح حتى ماشربت الكولا وقامت قطعت..
شوية تانية لقت حالها ناسية المحفظة تاعتها رجعت بسرعة أخدتها وأنا تحايلت عليها بيجي نص ساعة زمن وشربتها كباية سولار سكر مزبوط وقامت مستعجله وقطعت من تاني وإجا دور الأخ ماتور ابن مولد من آل الصوت العالي المزعج وبما انو من دار الصوت العالي المزعج وبما انو احنا عايشين بدار والدار هاي جمبها دار واللي بقلب الدار اسمهم جيران معناها احنا لازم نحافظ على حقوق الجيران الي ساكنين جمب الدار متخيلين وين القضية؟؟ انحافظ ع حقوق الجيران اللي ساكنين جمب الدار اما اللي ساكنين بقلب الدار لازم يضحوا عشان اللي ساكنين جمب الدار المهم وبلا طول سيرة ولت وعجن وحكي فاضي مالوش طعم تم القرار بدون اجماع انه سيتم تسكير الماتور في اللحظة اللي بيشوفوها مناسبة يعني بدون مقدمات وفجأة ممكن تلاقيهم سكروه وفجأة ممكن تلاقيهم ماسكروه طيب انا كيف بدي اعرف وقتيش رح يجي ع بالهم يسكروه ووقتيش مارح يجي ع بالهم يسكروه طيب ما هو انا مفتقده الأمن الكهربائي وبطالب بحقوقي الكهربائية كاملة غير منقوصة وبطالب الجيران يحطو قطن ودان مشان مايسمعو صوت الماتور العالي وبطالب اهلي يخلو الماتور مفتوح إلى إشعارٍ آخر عشان انا زهقت وبتهيئلي بنفعش أنا أزهق لانه زهقي من النوع الغريب والعجيب وكمان ولا اقلكم خليني ساكته أحسن .. (نور..*)
من الهم ما يضحك
ردحذفتحية لقلمك الساخر