اللي قرأ تدويناتي السابقة بعرف أديش انا معانية مع سواقين التكاسي وبالرغم من هيك يبدو إني مابتعلم .. مع انه اللي صار معي ما اله علاقة مباشرة بسواقين التاكسي بقدر ما اله علاقة مباشرة بما بعد النزول من التاكسي ..
أبداً كل القصة انو في يوم من ذات الايام وانا مروحة والسواق نزلني ع الشارع الرئيسي وانا ماشية بكل امان ولا ع بالي اشي .. فجأة بسمع حد بينادي عليا بالاول طنشت انو شو بدو يعني؟؟ بعد شوية الصوت علي وحسيته بيجري تجاهي وهو بحكيلي محفظتك محفظتك اممم معقول بجد واقعه ولا بضحك عليا؟ قلت مش حخسر اشي لو التفت فالتفت ولقيت فعلا انو محفظتي بإيده وهو ماسكته ومتبت فيها ووصل عندي بحكيلي هي محفظتك بحكيلو الله يبارك فيك يارب ويجزيك كل خير وبستنى يعطيني المحفظة لكن هو لسا ماسكها ومتشبث فيها بطريقة غريبة بحكيلي ماشي بس اعطيني الحلوان بالاول انا بصراحة تفاجأت من كلامه !!
حلوان !!
اممممم موقف كتير بايخ طيب ايش قصده بالحلوان؟؟ اكيد انا مش حاملة معي صينية حلو عشان احلي بعد ما الاقي محفظتي على فرض اني كنت عارفة انو هي حتضيع ..
معناها اكيد بدو مصاري دورت بجيبي لقيت معي شوية شواكل فكة بس مابجو 5 شيكل يعني .. طلعتهم واعطيتو ياهم
فنظر إلي نظرة شزرا .. وحكالي لالا اعطيني عشرة شيكل حكتلو والله ما معي عشرة حكالي هي المحفظة حكتلو والمحفظة فش فيها عشرات كلها عشرينات حكالي مش مشكلة أنا بفكلك :d انا حكيت انو يلا ايش بدي اعمل عشرة شيكل عشرة شيكل ما هي المحفظة كانت ضايعةب كل مافيها .. اعطيتو عشرين ورجعلي عشرة .. وحكالي ع فكرة كنت بقدر اخدها واروح او كان وقعت بايد واحد ابن حرام وما رجعلك ياها ..
الصراحة موقف غريب خلاني افكر بالدوافع اللي خلته يحكي هيك
هل هو فعلا محتاج العشرة شيكل هادي ولا بس انو حابب يكافئ حاله .. وهل لو انا ما كان معي عشرة شيكل كان حيصدقني انو ما معي مثلاً.. احيان كتير الواحد بتصدف مش حامل معه مبلغ او حامل ع القد .. بكل الاحوال المرة الجاية يا جماعة بتحطو بمحافظكم عشرة شيكل زيادة عشان لو وقعت وحد لقاها تعطولوا العشرة شيكل وما تنزنقوا
