الاثنين، 3 ديسمبر 2012

حواديت ع الخط

ركبت سيارة تاكسي عن الشارع وأنا مروحة بس دخلت السيارة كان السواق بحكي للست وبنتها اللي معي بالسيارة :"ولايهمك يا حجة ان شا الله ع رفح بوصلك" .. فصارت تحكيلو الله يبارك فيك ويحكيلها ولايهمك انا تحت امرك ونزلوا مجاملات في بعض وتأهيل وتسهيل وياعيني مَحلاهم .. وبينما هم كذلك فإذا بالست بتقول للسواق ايون يَخو .. خليك ماشي لجوا الشارع هادا حكالها ع راسي يا حجة ..
مشينا بشارع فرعي وفجأة وصلنا لشارع تراب
ي مكسر ووضعه زي الزفت ..
فحكالها الشارع مكسر يا حجة .. قامت حكتله بنتها لالا مش مشكلة خليك ماشي فيه !
نظر إليهن نظرةً شزراً وكان نفسو يطخهم !
حكالهم احنا مش هيك اتفاقنا انتو حكيتو لجوا شوية .. !
ونفخ نفخةً كادت تطيرنا كلنا وكمل مشي بالشارع لمسخم ع عينو !
وطول ما هو ماشي وهو بيتأفأف ! لانه الشارع نيلة فعلاً وطويييييل المهم إلا هي فجأة الحجة بتحكيلو هلئيت ع ايدك الشمال !!
يااالهوي !! كمان شارع مسخم اكتر من اللي قبلو ! السواق صار يحكي سنسكريتي !
وصرنا ندخل من شارع لشارع والوضع كان طيني منخفض مستوى الغيم !
وأنا طول الوقت كنت أفكر بأول المحادثة كيف بدأت لما استعد يوصلهم ع رفح من باب المجاملة واللسان الحلو !
وكيف الحجة لما شافتو هيك استغلته ابشع استغلال ! فكان جاي ع بالي اقولها يا حجة انتي وبنتك المصونة ازا كان حبيبك عسل ما تلحسوش كلو .. وازا رايحة ع مكان شبيه بمثلث برمودا وتلاترباع السواقين حيتوهوا فيه ففيكي تطلبي سيارة طلب توصلك وين مابدك بدال ما تبهدلي العالم معاكي وأنا المسكينة شو زنبي الف كل هاللفة المحترمة !
طبعاً انا جوالي طفا وما كان في مجال اطلب سيارة فاضطريت اركب عن الشارع ! وتورطت كما كل مرة بغلط فيها وبركب عن الشارع !
بالآخير انتهت المواصلة العظيمة هادي بانه الست دفعت للسواق 4 شيكل ع اساس انها متفقة انو 2 شيكل عنها و 2 عن بنتها بس هو ما قبل وطلب كمان شيكل زيادة للأمانة انه طلع مزوق لو سواق تاني كان دفعها عالاقل عشرة شيكل .. ضل طول الوقت يتأسفلي أنه أخرني كل هادا الوقت ..
انا بصراحة كنت مُستفزة لإنو أدن المغرب وأنا بالطريق .. بس بكل الاحوال الموقف كان لزيز .. والست هي وبنتها فزيعين وشاطرين باستغلال البني آدمين .. وكسبتلي أكم من مرجحية ملاهي مجاناً مع الشارع الترابي الطالع والنازل واللفات والدورانات وتخطي مستنقعات المياه بطريقة فزيعة شوية نميل يمين وشوية نميل شمال !

الثلاثاء، 27 نوفمبر 2012

أرشفة تغريدات تمن أيام من قاع الدست


|| أرشفة تغريدات تمن أيام من قاع الدست ||
14 نوفمبر
  • #غزة الآن تضرب ! لا أعتقد أنها حرب قادمة إنما تصعيد ! وقرع لطبول الحرب !
  • كتير متفائلة كنت انه بس شوية جعجعة بلا طحين .. بس طلعت محللة سياسية فاشلة من الطراز الأول ..
  • الموت عنا أحلى بمليون مرة من انه نعيش بصحرا، احنا شعب مابيهرب من الموت ، الموت اللي بيهرب منه
  • عجيبة اصوات الانفجارات بتحسو الارض بتهتز كتير ! كإنو مغيرين نوعية الصواريخ ياخوفي تكون صيني :p #غزة
  • فايقة ورايقة كنت ..
  • احلى اشي بس الفلسطيني في غزة يسمع صوت القصف بيروح بشتري ربطتين خبز وشوية بنزين وبيروّح .. غريزة البقاء
  • بنحاول نغير جو مع بعض الاصدقاء ع الفيس وبنلعب حيوان جماد انسان بلاد :D هاتولي اسم جماد ع حرف الظاء؟
  • وقت ما كتبت هادي التغريدة ما كنت عارفة انه احنا رح نتحول لجماد من الرعب اللي شفناه بالأيام اللي اجت بعدين .. لانه هادا كله لسا بـ 14 نوفمبر ..
  • هادا قصف ولا حد من الجيران سكر الباب بعنف ؟؟
  • ضايل 7 دقايق وتقطع الكهربا ! معقول موظف الشركة يحزن علينا ويخليها جاية؟
  • ورداً على دعوة هنية لعقد قمة عربية علقت بالقول :بلا قمة عربية بلا بطيخ إمبسمر ! شو بدها تعملنا القمة العربية؟؟؟
  • وآخر تغريدة بـ 14 نوفمبر كانت ..
  • انفجار انفجااار واحد زقف وواحد طار وبعدين عاااد
15 نوفمبر
  • اليهود عملينلنا نيو لوك بالتصعيد هادا لانه صوت الانفجارات جديدة .. يلا تغيير
  • ورجعنا لقصة سينا والغباوة اللي في كل واحد بفكرنا حنهاجر ع سينا وكتبت هالحكي : نهاجر ع سيناااء !! في حد بيترك مدينة غزة الساحلية الجميلة وبيروح الصحراء القاحلة ! والله انا اموت واتفتفت ولا اسكن سينا !
  • أنا ميتة نعس .. ميتة برد.. ميتة خوف .. 3 في واحد :D
  • وبعد هادي التغريدة كتبت تغريدة تانية كان إلها أكبر نسبة إعادة تغريد في تاريخي التويتري .. حيث وصل لـ 77 وبصراحة اكتير انبسطت انه لاقت صدى واقبال وببساطة كلماتها في ناس تأثرت فيها والتغريدة هادي بتقول ..
  • حكمة شائعة في غزة بتنحكى لكل واحد "خوّيف" بالعيلة || اتطمن طول ما انتا سامع صوت القصف فهو مش عليك ||
  • قصف حااااااااامي كتييييييييير الله يستر
  • ياااارب يااارب نصرك يااارب احمينا يارب صوت القصف مرعب
  • حكمة من غزة || أن ترجف من البرد أهون ما زجاج الشباك يعمل معادلات فيثاغورس في وجهك || لأن صوت القصف يؤدي لتكسير زجاج النوافذ المغلقة
  • فتحت التلفزيون أغلب القنوات جايبة برامج إعادة .. وبس فكرت شوية اكتشفت انه انا عايشة بمشهد إعادة برضو :p ,, وهي كمان صوت قصف إعادة
  • هو هادا صاروخ ولا قطار الرعب في مدينة ملاهي !!
  • ياويلي .. يااااويلي رعب رسمي !! يارب سلم
  • العمارات والبيوت في غزة بتلعب نط الحبل مع كل صوت قصف جديد !!
  • في بيوت بتلعب نط الحبل .. وفي بيوت بترقص .. والصواريخ بتلعب معنا شريدة :D
  • هي انتا وياه اللي بتحوموا فوقينا .. ساعة زمن أريح راسي وبعدين كملوا !
  • ما هو يا القصف يا وجع سناني !! حبّابين إنتو .. مش وقتكم هلئيت!!
  • الله يسامحه المؤذن نفخ بالمايك قبل ما يأدن جاب أجلي من الخوف :D
  • أنا بهادي اللحظة هديت وبآكل آم أند آمز .. بس وقت القصف من الصوت القوي والمتتالي الواحد بيلتمس ! بعدين بيرجع لحالته الطبيعية
  • كل عام وانتو بخير اليوم عيد الاستقلال (وجه مسخسخ من الضحك)
  • مع الخوف والبرد اكيد كلكم نسيتوا تشربوا ميّا .. بس حبيت أزكركم كلكم تروحوا تشربوا عشان صحتكم "قال يعني"
  • مابتلاحظوا انه اليهود بختاروا اسماء سينمائية لعملياتهم .. هالكلاب والله عندهم نظرة فينة :p
  • إلنا أكتر من 12 ساعة ع نَفْس النَفَسْ .. بوم بووم دوووف بووووم دوووف من السما وبالارض العمارات بترقص ع الوحدة ونص #غزة
  • يااالهووي الصوت قوي وعامل زي "طيري وعلي يا وزة "
  • أنا استويت والحفلة لسّا شغّالة في #غزة
  • أعلن حقدي ع كل حد نايم طول الليل في #غزة وأنا مش عارفة اغمض عينيا
  • كيف بدي انام والطيارة بتزن في نافوخي ؟!
  • انا صليت الحمد لله ودعيت ربنا اكيد بس النوم بهيك حالة معناه إني بضحك ع حالي لاني حقوم مفزوعة بعد عشر دقايق من صوت قصف جديد
  • ابسط يا عم ||| هي كمااان قصف ..
  • أنا صرت شايفة "الريتويت" "لايك" و"الماوس" " كيبورد " من النعس .. #غزة
  • مخي بيهددني إذا ما قمت أنام رح يفجر حاله || تصبحوا ع حرية ..
  • نيلاااااا توي صحيت ع صوت القصف وأنا لسا ما الي ساعتين نايمة ..
  • بالكم ابن جيرانا حيعمل عرسه اليوم ولا لأ #غزة
  • أنا الآن بس سامعة صوت أقدام لولاد الصغار وهي بتخبط بالكورة وصوت الكورة بتخبط بالحيط ^_^ #غزة بتحب الحياة
  • ||سامعة صوت لصغار بيقولو لبعض|| مين بدو يجرب الموت ؟ يلا نلعب طيارة؟ أنا طيارة وووووو بصير يجري وبعمل حاله بيقصفهم .. ||ياريت هيك الموت||
  • هدوء حذر .. توقعاتكم؟
  • طبيعي يكون في قصف بهز الدار هز وأنا قاعدة بآكل كيندر تشوكلت ؟ #غزة

16 نوفمبر 
  • العجيب إنه بس يكون القصف قريب تلقائياً بتلاقينا رحنا ع الغرفة التانية ليش مش عارفة هههه
  • #تعليمات_الحرب_غزة قبل ما تصدق أي خبر فكر فيه وتأكد من إعلان جهة رسمية للخبر بعدين احكيه ..
  • #تعليمات_الحرب_غزة تعملش فيها فهلوي وتلمس أهلك وإنتا بتتخيل السيناريوهات الجاية لإنو مش ناقصنا
  • #تعليمات_الحرب_غزة كن مع الله ولا تبالي ..
  • كلمت صديقتي لأطمئن عليها وع بناتها لصغار حكتلي إنها حكتلهم وفهمتهم أنه هادا صوت الرعد اللي قبل الشتا .. وهم لسا بستنوا الشتا! #غزة
  • وقت القصف نسبة الخوف بتزيد وبتنقص بحسب وجودي على فيسبوك وتويتر ..#غزة
  • اصلااا عادي الدار نطت ورجعت تاني مكانها #غزة
  • بدينا لعبة نط الحبل .. كان اللابتوب رح يوقع مني والله ستر ! #غزة
  • الغريب انو في ناس نايمة ياعمي ودانهم من حديد هدول ولا إيش #غزة
  • لمصيبة انه القصف شغال والدار بترقص وأنا بنط من الخوف وتيتا بتجلي #غزة
  • اللي توي قصف #غزة أكيد شارب حاجة قبل ما يقصف !!
  • بعد الحرب كل الشعب محتاج يراجع دكتور أنف وأذن وحنجرة #غزة
  • حالياا انفجارات في مخي وستمتد إلى عيوني مع اهتزازات من البرد في كافة أنحاء جسمي بدي أنااام يا عالم !! #غزة
  • ايش الوضع اروح أنام ولا لسا في ملاهي ؟!
  • انفجار جديد بس طز فيكو
  • مين مدعس ع وجه عباس بالشبشب ؟! منظرو فزيع ! #عباس #غزة
  • قصف جديد وحامي كتير وكمان BIG TOOzZZZZ #غزة
  • #عباس باختصار هو المرأة التي تولول على زوجها في الزمخشري :D
  • اليهود فاهمين الحرب غلط .. بحسسوني بيلعبو مونوبولي كل مايمروا ع مكان بيرجعوا يقصفوه تاني .. جتكم خيبة فوق هبلكم :D
  • وطيري وهدي يا وزة طرناااا ونزلنا تااااني بس عااااااادي برضو طز فيكووو يا اسرائيل يا مهابيل هههههه :D
  • وهي استوى الرز بحليب زاكي بعز القصف #غزة
  • انا حابة أطلق اسم على الحرب هادي من بعد إذن معاليكو يعني .. بدي أسميها حرب "نط الحبل" #غزة
  • الإشي الوحيد للي منغص عليا حلاوة الحرب وجمال اللحظة وروعة الموقف الناس الغبية اللي بتفبرك أخبار وبتطلع إشاعات وبتهول الأمور #غزة
  • نفسي أقطع النت عن كل واحد بتهابل وبينزل اخبار غبية .. وأقطع الكهربا عن كل واحد بيرد عليه #غزة
  • بعد الرز وحليب وكيكة البرتقان محتاجين نملّح وفش أزكى من ساندويشة دُقَّة مأحمشة ع الغاااز #غزة
  • الهدوء الحالي مشجع ع النوم بس مش هاين عليا أنام والكهربا جاية #غزة
  • الهدوء مع صوت شمئرين الساعة الزنانة بعملي توتر !! ما هو القادم ؟ أكيد فجأة حننط من مكانا بس متى حتيجي هادي اللحظة .. هووف #غزة
  • يلا هي بدت الحفلة شكلو المايك كان خربان #هدوء_في_غزة
  • والله الوضع هادي فعلا نيهاهاهاها (وجه شرير)
17 نوفمبر
  • كده صح قصف الان ههههههه هههههه كنا لسا قاعدين بنقووول ايش فيه بمممممم هههههههه صرنا نضحك هسترنا
  • خمس انفجارات كان البيت بيدبك معاهم .. والله الصوت مرعب بس رغم هيك احنا بخير وباحسن حاااال يااارب كون معنا يارب
  • أنا هلئيت عرفت ليش كان في هدوء بغزة لأكم من ساعة .. كنو الطيار راح اخدلو دش ورجع !! يخرب بيتك محل منتا طاير يا بعيد #غزة
  • يا الله أديش صوت آدان الفجر بالذات بريحني .. يااااه شو بعشق هالأدااان .. #غزة الله أكبر الله أكبر .. الله أكبر الله أكبر
  • اليهود هستروا وأنا صدعت يلا نلعب سوا سوا ؟ مافشر يا كلاب :p
  • نيلااااا توي لعبت دار ودور في غرف البيت مع كل ضربة كنت أنط ع أوضة وأنا حاضنة لابتوبي ومش فاهمة ايش فيه؟؟؟ #غزة
  • أنا اصلا حاسة انه في لعنة بتصيب كل غزة بس أقرب ع التخت ! لانه هي تالت مرة بس آجي بدي اوصل التخت بتشتغل الدبكة
  • ما حيجيب آخرتي إلا المتخلفين اللي بقولوا انه اللي بصير عنا متعمد مشان يغطي ع جرائم بشار في سوريا إرحمونا يا أصحاب العقلية الفزّة #غزة #سوريا
  • ياعمي صوت الزنانة هادي بحسسني إنو غزة عبارة عن كرسي كبير في عيادة دكتور الاسنان زززززززززززز هووووف #غزة
  • عزيزتي السيارة اللي مارقة بسرعة من شارعنا مش وقتك بالمرررررة ! لمستيني #غزة
  • ححكيلكم عن اكتشافي الهام قبل ما أنام أنا اكتشفت انه الزنَّانة ما هي إلا دبّااااانة كبيرة وإلها ديل كمان || الزنانة يعني طائرة الاستطلاع||
  • ياويلي ع صوت القصف والرعب اللي كان توي !!! شو هالجنون والتخبط رعبونا والله ! لا ليل ولا نهار عارفين إنّام !!
  • #غزة بين أيدي مجانين .. رحمتك فينا يارب
 18 نوفمبر
  • يا الله إعلامنا لو بس يبطل حتة التهويل الإعلامي والهيلاهوبااا حيكون إعلام زي الفل :D
  • إعلامنا بيموت بالتهويل والتبهير ... عزيزي الصحفي هادا خطاب إعلامي مش طبخة مقلوبة! مافيش داعي للبهار والملح .. #غزة
  • المقلوبة تحتاج لبهارات أما الإعلام فهو زاكي حلو ملح والله #غزة
  • حكينا بلاش خبط بواب يا ابن جيرانا العزيز في طريقة تانية احسن انك تمسك الباب بشويش لحد ما يتسكر .. فش داعي اذا كنت معصب تنزئنا #غزة
  • مش مفهوم استهداف شوا وحصري مش مفهوم #غزة
  • بلاش تخلف ونقل اخبار من مصادر عبرية وغزة الان بكفي توتير ولعب باعصاب الناس احترموا اعصابنا شوية لانه الوضع مش متحمل #غزة
  • بعض الناس تخلت عن عقلها ووضعت بدالها Ctrl+v || نور ||
  • إرحمونا يا جهابذة الانترنت بتحليلاتكم ايييه يا زمن صار كل من هب ودب محلل سياسي ومراسل صحفي ! #غزة
  • انا صرت اتخيل كل شوية في انفجار وبحط ايديا ع وداني وبتجمد في مكاني وبعدين بكتشف انه فش إشي !!
  • عباس بيقول انه الحرب بتسعى لتكريس الانقسام مش عارف انه توحدنا كلنا ضده :p
19 نوفمبر
  • الفلسطيني في #غزة إذا انضرب مكان جمب بيركض ع المكان اللي انقصف مش بيهرب منه فلما تنضرب مدينته رح يجري يحتضن الموت فيها مش حيطلع منها !
  • لكل مصري خايف نستوطن سيناء في حد يسيب الجنة دي ويروح الصحرا يخويا؟! pic.twitter.com/8apsxdsR
  • الفرق بين حرب 2008 وحرب 2012 || بـ 2008 العرب تضامنوا معنا بالاتصالات الهاتفية بـ 2012 العرب تضامنوا معنا على الأرض || التاريخ يتغير ||نور
  • بتصدقوا فجأة وإحنا قاعدين إلا حد بسأل ياجماعة هو إيش اليوم وقعدنا نحزر من حد مابدت الحرب ماعادت الايام تفرق معنا لانها بتشبه بعض كتير #غزة
20 نوفمبر
  • في تلك اللحظة اللي بتتمنى بطارية اللابتوب تضل شغالة 10 ساعات اعرف انك في #غزة
  • توي لعبنا هيلاهوووبااا #غزة
  • في #غزة ممكن تصير تفكر لو إلك 4 ايدين .. ايدتين تكتب ع الكيبورد وايدتين تسكرلك ودانك ..
  • أيها الآمنون في بيوتكم بعيداً عن غزة .. هلّا أعرتموني ساعةً من أمنكم لأنام فيها ثم أعود #غزة
  • يحدث الآن في كل بيت في غزة|| تنين عمالهم بيتناقروا اذا في تهدئة ولا لأ || صح ولا غلط :P
  • لقد قفزت قفزة ما قفزهاش فيليكس بزمانه قبل قليل BOOOOVVVVVV #غزة
  • إسرائيل تعيش الآن لحظات || حلاوة الروح ||
  • والله توي قفزت قفزة أسخم من قفزة عباس بن فرناس لما حاول يطير #غزة
  • ظلموا البحر يا غزة فيكي ! طلع الهدوء هو اللي غدّار .. || نور ||
  • #انا_صامد لإني بتنفس غزّة
21 نوفمبر
  • المقاومة بكل أطيافها هي من تمثلني .. أثق بقراراتها إن كانت حرباً فحرب وإن كانت تهدئة فتهدئة .. مش حتفلسف وأقعد أنظر وأزاود ع دم الشهداء #غزة
بصراحة ما توقعت اني اكون كاتبة كل هادي الشغلات !! وفي اليوم الواحد !! وفي شغلات كتير ما نسختها وتركتها لانه مش حقدر الاحق  عليهم كلهم .. كانت ايام صعبة جداً ومليئة بالمعاني المختلفة والمشاعر المختلطة !!
اللهم أنت حسبنا ونعم الوكيل .

الأربعاء، 14 نوفمبر 2012

تدوينة عفوية بوقت زهق نفسي أثناء القصف

بوقت القصف والأجواء المرعبة هادي .. بس نسمع صوت باب بتسكر أو سيارة بتمشي بسرعة بنلتمس للحظات ! بعدين بنستوعب انه فش اشي ..
وبوقت القصف بيحلى الأكل والـ"حَشْ" ههههه بتلاقي كلو قاعد بياكل شيبس عصير كولا بزر وببدوا يتوحموا .. نوع من انواع تفريغ التوتر ..
بالإضافة لإنو لولاد الصغار ببدوا يستعرضوا مهاراتهم السياسية الفذة في التحليل واللي احيانا بكون بدك تمسكهم وتسكرلهم تمهم وتحكيلهم مش ناقصاكو ع فكرة !
وفي كل بيت بتلاقي الشخص البارد اللي مابفرق معه شو بيصير ! وبتلاقي ع النقيض منه الشخص الخويف اللي بلتمس لو حد حكاله بخ وقت القصف ! وبتلاقي المتوتر وبتلاقي اللي بقعد يحلل ويفسر ويهول ! بس كلهم ساعة القصف بكونوا فاتحين تمهم وبعدين بقول اول واحد قصف برد التاني قصف التالت بقول قصف صح؟ بعدين ببدوا يحللوا نوع الطيارة اللي قصفت والصاروخ وشو ممكن يكونوااستهدفوا !
بعدين برجعوا يكملوا اكلهم وانتظار الصاروخ اللي بعده !
عدا عن انه كل واحد حاطط وجهو قدام لابتوبه او التابلت الخاص فيه او جواله والتلفزيون والراديو مفتوح بنفس الوقت ..
بس متى بيصير في هبة جماهيرية بالبيت غير وقت القصف .. وقت ما يقطع النت او تقطع الكهربا بتلاقيهم نطو بنفس المكان واتطلعوا ببعض نظرات غريبة ..
لو قطع النت ببدا الكل يتحوم حوالين الراوتر وببدوا يعملو شغلات غريبة اللي بطفيه وبفصله اللي بيقعد يرج فيه او بينفخ عليه واللي بيقرأله تعويذة ع اساس حيرجع بعدها!
ولما تقطع الكهربا بتبدا مشاورات انه حنشغل الماتور ولالاء طيب في سولار وبنزين بكفي ولالاء ؟!
وبعد طول الرجاء ببدا قرار الاهل انه حنشغل الماتور ساعة بس فهم بيصيروا ينطوا وفجأة بيجي صوت صاروخ بوقعهم كلهم ع الارض ههههههه انا ع فكرة مش عارفة ايش كتبت فوق .. بس هو مع الزهق النفسي اللي انا فيه

الخميس، 4 أكتوبر 2012

40 شيكل في معرض الكتاب !!


لقد زرت اليوم معرض فلسطين الدولي للكتاب .. كنت أهدف من هذه الزيارة التعرف على أقسام المعرض وما يحتويه من كتب وتسجيل ما يعجبني لأقوم بشرائه في زياراتٍ أخرى .. وبينما أتجول في إحدى دور النشر اللبنانية استوقفني كتاب رائع جداً لم أتردد لحظة بشرائه لما يحتويه من معلومات تاريخية قيمة نادراً ما تجدها من مراجعها الأصلية الصحيحة وهو كتاب موسوعة الحسن والحسين رضي الله عنهم سبطي رسول الله عليه الصلاة والسلام ..
تلقفت الكتاب وأنا مسرورة جداً به .. استدرت نحو المسئول في الزاوية وقلت له :" بأديش هادا"؟ .. نظر لي طويلاً ثم قال "هيدا بـ25 بس هو اصلاً بـ 40 بس شو نعمل هيك الاسعار صارت مشان غزة ! يلا بـ 25" بصراحة حكاها بنبرة وكإنو بيتحسر اديش نزل سعر الكتاب .. انا اتدايقت .. وللحظة ماعرفت شو اعمل .. حاولت اطنش الموقف تماماً ودفعتله 25 ومشيت .. وكملت لفلفة بالمعرض وروحت ع البيت .. وفتحت الكتاب وبديت أقرأ .. كنت كتير متشوقة إني أقرؤه .. بس المشكلة انو كلامه ضل يرن بوداني .. انو حقو 40 ويلا مشان انتو بغزة ايش بدنا نعمل صار حقو 25 .. الكلمة خنقتني كتير .. دايقتني كتير .. مابحب نظام الشفقة هادا !! عادي لو حكالي حقوا 40 كان دفعت بدون مشكلة . . ولو هو حابب يخصم مافي داعي يحملني جميلة او كان ممكن حكاها بطريقة الطف بشوية .. انا ضليت مستفزة وماقدرت اكمل أقرأ الكتاب .. اللي عملتو إني اتصلت ع مكتب التاكسيات وطلبت سيارة .. وطلعت تاني ع معرض الكتاب ورحت لنفس الزاوية اللي شريت منها الكتاب وهدفي اني ادفعلو باقي حق الكتاب مشان أقدر أقرؤه بنفس وما احس انو في حد متمنن عليا او متصدق عليا فيه !!
اول ما وصلت حكيتلو يعطيك العافية .. انا قبل شوية اشتريت منك هادا الكتاب بس بصراحة مش قادرة أقرؤه .. هو فكر انو انا مش عارفة أقرؤه فحكالي اذا بدك بنرجعه فش مشكلة .. حكتيلو لاء انا مابدي ارجعه انا بدي ادفع باقي حقه ! انتا حكتلي انو حقه بـ 40 وانا بدي ادفع 40 حكالي لالا ما تفهميني غلط .. انا آخر همي المصاري وانا اسف لو دايقتك بكلامي بس انا هدفي اشجعكم على القراءة .. حكتلو بس طريقة الكلام كانت بتدايق وانا مش حترتاح غير لما ادفعلك حقو كامل اعتذري كمان مرة ورفض ياخد حق الكتاب وحكالي اتبرعي فيهم لاي حد مشان انا ارتاح وانتي ترتاحي .. ابتسمت وحكيتلو تمام ..
كان نفسي احكيلو ع فكرة .. احنا بنسافر ع مصر مشان معارض الكتاب هناك وبنشتري كتب وفش حد بخصملنا بالعكس بنشتري الطاق طاقين .. ومافي مشكلة لانو احنا شعب بنقدر قيمة القراءة والكتب ..
انا مش ضد انو هو يخفض اسعاره تضامناً معنا .. بس ضد اسلوب الشفقة وتحميلة الجميلة هادا !! وضد الناس اللي بس تشوف حد من برا بتقعد تتشحوتلهم وامانة واحنا من غزة احنا غلابة رخصلنا شوية !! انا يمكن مابلومه ع قد مابلوم الناس اللي بتفاصل باسلوب مقرف وبايخ وببينا بصورة كتير سيئة ..
وقتيش العالم العربي يفهم انو احنا مش شحاتين !! احنا بني آدمين طبيعيين .. !! وكرامتنا أعز وأغلى ما نملك .. وسلامتكم ..

السبت، 2 يونيو 2012

في طابور البنك .. !





عادي زينا زي اي بني آدمين بالدنيا وقت الراتب أكيد بدنا نروح نصرف الراتب .. والنا عائدة عليا انا وصديقاتي التنتين .. متجهين إلى البنك وبس وصلنا عند المصعد كان في رجال بالمصعد واحنا التلاتة جايين بدنا ندخل وفجأة وبدون أي إنذار لقينا في واحد مشي بسرررعة شديدة وقطع علينا الطريق وركب بالمصعد وسكر الباب وطلع بدون حتى اعتذار .. اتطلعنا ببعض نظرات غريبة ! ووقتها حكتلهم انا حسيت حالي وكانو بالشارع وفي سباق سيارات مين يوصل أول !! 
ما علينا موقف صغير وعدّى بسرعة .. بس وصلنا البنك كان في قدامنا شخص واحد بس واحنا وقفنا وراه بنستنا دورنا وفجأة شفنا أحد الأشخاص اللي اجا بكل احترام حكالنا ممكن يا جماعة أقبض قبلكم عشان في سيارة بتستناني تحت اتطلعنا فيه هيك .. وانا بعقلي حكيت ايش نظام التخجيل هادا ! طيب ما هو مش منطقي في واحد رايح يقبض من بنك ومخلي سيارة تستناه تحت مش منطقي !! بس قلنا بكل الاحوال ما علينا بالنهاية هو طلب بذوق واحترام وحكيناله تفضل
بس الصدمة وين ؟؟ انو كل شوية بيجي واحد بيتطلع علينا احنا التلاتة وبحكيلنا بدي اقف قبلكم ! وكإنو مستكترين ع حالهم يصفوا بالطابور ويستنو 3 بنات مثلاً ؟؟ يعني عيب بحقهم انه يصفوا يستنوانا احنا .. ومشان رجولتهم بتنقح عليهم لازم يكونوا قبلنا !! 
واحنا واقفين وشايفين المنظر هادا قدامنا قررنا انه نوقفهم عند حدهم وصرنا نحكيلهم انه احنا جايين من قبلكم وانه الطابور مفروض الكل يلتزم فيه ! .. 
بس اجا دورنا 
اتطلعت فينا الموظفة تطليعة مش ولا بد !! 
فاحنا استغربنا !! 
بنحكيلها ايش فيه ؟؟
بتحكيلنا انتو متأكدين انو من هنا رواتبكم نازلة ؟
اتطلعنا ببعض ومن الصدمة ماعرفنا نتكلم واكتشفنا انه احنا رايحين البنك الغلط :D 
ورحنا ع البنك الصح .. وهناك رجعنا وقفنا ع طابور تاني بس الحلو بالموضوع انهم عاملين طابورين للرجال وطابورين للنساء وطالما احنا نساء في بعض فش وحداة بتسترجي تحكيلك لو سمحتي بدي اخد مكانك لانو اكيد حياكلوها :D


مش عارفة بس احيانا كتير في رجال بمجتعنا فاهمين الرجولة غلط .. وفاهمين مواقف الرجولة كمان غلط .. يا جماعة الرجولة انك تحترم المبادئ وتحترم القيم العامة وتحترم المرأة وماتنظرلها انه هي عبارة عن مواطن درجة خامسة .. ! 


وبس ..

السبت، 31 مارس 2012

المواطنين عبارة عن شواكل تتحرك !



احيانا بقعد اتخيل انو سواقين التكاسي بس يكونو ماشيين بالشارع بيشوفوا البني آدمين هي عبارة عن شواكل تتحرك وكتير بيفرق مع السواق اكم شخص اللي واقفين فمثلاً لما يشوف 4 اشخاص واقفين وولد صغير جمبهم فهو بصير متخيل انه في 5 شيكل هو لازم يقتنصها ولو كان المشوار بعيد شوية فهو فعلياً شايف قدامه 10 شيكل .. وكتير بتخيل لو انه السواق ماريو وقاعد بينط مشان يجيب العشرة شيكل هادي لكن الكارثة الكبرى لما يوقف السواق ويسال ع وين فبحكولو ع الساحة فبحكي اطلعوا فبطلعلوا واحد بحكيلو ساحة واحد ! وفجأة العداد بينزل من عشرة شيكل لشيكل فبيصاب السواق بالاحباط وببطل شايفها موفية معه فبإشر بايدو هيك وبحكيله لالا فبقوم برجع اللي بدو يركب بحكيله طيب بعطيك مواصلتين السواق بضل يفكر تلات ثواني وبعدين بحكيلو مع تنهيدة فظيعه اركب ! 
اللي غايظني بكل الموقف انه يا جماعة مش ضروري كلكم تتكوموا جمب الشخص اللي حيركب اولا مشان ما يتوهم السواق وتانياً عشان ما تدفعوا الغلبان أجار مواصلتين لانه بالوضع الطبيعي كان حيركبه حيركبه لو كان لحاله .. 
هالحكي واحنا وضع البلد كان تمام فمابالكم بهادا الوقت اللي الواحد بشتهي يشوف سيارة وبس يشوفها بصير يدعي يارب توقف احيانا بتوقف بس بتكون خربت او خالص السولار فيها مش وقفت مشان تركبنا !
المهم انه السواق بطل يشوف المواطنين عبارة عن شواكل .. بل المواطنين صاروا يشوفوا السيارات عبارة عن ملبس وشوكلاتات الاعراس اللي بينحدف فجأة علينا ومابنعرف من أي اتجاه وبنحاول نلقطه بس بالاخر الناس اللي جمبينا بياخدوه ! 
والمواطنين الغلابة قاعدين بهالشوارع كل مايشوفوا سيارة بنبسطوا يا ويلي وبصير يحضر بحاله شو بدو يقول المشكلة انو من كتر ما هو اله ساعتين ساكت بس توقف سيارة تحكيلو ع وين بكون نسي هو وين رايح فبروح السواق ..وبنغاظ المواطن من حاله .. والحياة حلوة وكل عام وانتو بخير وعظم الله أجركم وينعاد عليكم بالصحة والعافية وعقبال عند حبايبكم ..

الأربعاء، 22 فبراير 2012

مشاعري تجاه طائرة !



مش كتير منيح الشعور لما الواحد يحس انو كل الناس اللي حواليه حتوصفه بالمجنون ، بس بنفس اللحظة هم مش فاهمين عليه وهو مش فاهم عليهم بمعنى آخر وبلا كترة حكي زي اللي ممكن يكون فاقد بصره ويشوف الدنيا لأول مرة اي حد  حيشوفه وهو بيتطلع ع الدنيا بدهشة واستغراب حيقول عنه اكيد مجنون ،، أي حد حيشوفه يقول يا الله السما زرقا ! أكيد حيقولوا عنه مجنون بس هو بالواقع اول مرة يشوف السما ففرحان ع لونها .. 
في يوم من ذات الأيام لما كنت بمصر والساعة كانت يمكن 2 بالليل وأنا بحاول أنام فجأة سمعت صوت طيارات سكرت وداني وصرت اتطلع يمين وشمال وانا حاسة حالي مش فاهمة مابخفي عليكم انو بديت اشعر بتوتر بسيط سرعان ما راح بمجرد ماتذكرت انو انا بمصر مش بغزة ومضيت الليلة ع خير .. في اليوم اللي بعده رحنا على معرض الكتاب اللي بمدينة نصر وكان بالنسبة الي كنز ثمين اشتريت ما يقارب الـ 70 كتاب في تخصصات الاخراج والسينما والتمثيل والمونتاج والموسيقى وكل ما يتعلق بالأفلام  والإنتاج ،، وبينما احنا بنتجول بالمعرض ورندا كانت ماشية معي بشدها هيك بحكيلها رندا شووفي .. رندا صارت تتطلع بحكيلها ولك شوفي الطيارات يا الله ولك طيارات ماشية عادي بالسما ومابتقصفش رندا لسا بتطلع فيا وبتقول اكيد بينها وبين عقلها مالها هادي البنت .. أنا طلعت جوالي وبديت أصور الطيارات بشكل لا إرادي .. مش لاني ولا عمري شفتها بس لاني ولا عمري حسيت بالأمان لما أشوفها بس هالمرة كان شعور مختلف انا صرت اتطلع بالطيارات وعيوني مش راضية تفارقها .. حسيت حالي زي طفلة صغيرة بتلاحق بنظرها طيارة ورق مبسوطة عليها .. 
يا الله .. طيارات طبيعية بتحمل بني آدمين مسافرين ،، 26 سنة الي كلمة طيارات مابتعنيلي إلا أنه في حد الآن بدو يموت هو أنا ولا غيري ؟ في صوت عالي كتير الآن بدي أسمعه .. حينكسر الشباك؟؟ ،، طيب لو انكسر الشباك حأنجرح؟ الأفضل أبعد عن الشباك وبوسط زحمة الافكار هادي صوت حد بحكيلنا نفسوا الشبابيك شوية مشان لو صارت ضربة قوية ما ينكسروا الشبابيك ..
بتذكر زمان أيام الانتفاضة الثانية بسنة الـ 2000 كان في لطيارات الإف 16 معيار أنه بتلف تلات لفات بعدين بتقصف ،، فكنا نقعد نعدلها اللفة الاولى .. اللفة التانية .. اللفة التالتة ... وهووووووووووب قصف .. بنحاول نسلي حالنا وبنعد للطيارات لفاتها .. صوت مرعب تربينا عليه وانحرمنا الشعور الطبيعي تجاه اي طيارة .. ممكن تمر .. لانه بس اشوف اي طيارة مش بسهولة ممكن اتقبل انها طيارة مسافرين واكيد حضل اتطلع فيها واكيد الناس حتحكي عني مجنونة .. انا فعلا مجنونة متشوقة للحظة حرية وأمان في بلدي .. 
ومشتاقة للحظة أحلق فيها بسما غزة فوووق فوووق بطيارة من مطار بلدي .. بتصدقوا اني مشتاقة اشوف غزة من فووق أكيد حتكون حلوة كتير .. حيكون شعوري حلو والطيارة بتنزل شوية شوية وبتبدا البيوت والعمارات تبين منيح .. وأقعد أحزر وين دارنا بالزبط؟ وهووووب إلا أنا واصلة المطار بكل شموخ وفخر واعتزاز نازلة ورايحة ع بيتي تاني .. سافرت باحترام وبحرية وبمطار بمدينتي الفلسطينية بدون ما يكون في حد بتحكم فيا !!