كنت بدي أروح ع الجامعه وكان عندي محاضرة ع الساعة 8 وكنت حاسة حالي عاملة إنجاز وطني وتاريخي اني صاحية بدري مشان اروح ألحق محاضرة الساعة 8
كالعادة وقبل ما أطلع من البيت بفتش بالمحفظة مشان أتأكد شو في معي مصاري مشان ما اوقع بحرج
المهم فتحت لقيت معي 10 شيكل ماسك و100 شيكل ماسك
قلت يعني ان شاء الله تكون بسيطة ويكون السواق معه فكة من مبارح
وقفت ع اقرب مكان جمب البيت مشان أركب منه
اول سيارة اجت حكتله مفترق الصناعة حكالي لاء وراح
التانية مشيت والتالتة زبطت معي وركبت
كان قاعد قدام جمب السواق شاب وجمبي بنتين
قلت بعقلي معه 3 يعني اكيد دافعين كل واحد اقل اشي شيكل ويمكن يكون معه 5 شيكل من الاصل وشيكل نسي يعطيه لابنه مصروف يعني هي 9 شيكل باقي العشرة اللي حعطي ياها
المهم طلعت العشرة شيكل وبكل ثقة الدنيا حكتله تفضل
السواق اطلع فيا نظرة غريبة عجيبة وصار يبهدل ويعلي صوته ويحكيلي انا فاهم هاي الحركات
انا انصدمت بقول بعقلي حركات ايش يعني !!
حكالي قوليلي بدكيش تدفعي مش تعطيني عشرة شيكل من وين بدي أجيبلك فكة وصار يحكي كلامي يمين وشمال وكل شوية يزيد علي صوته
وفجأة شفت الشاب اللي قاعد قدام بطلع من جيبه شيكل مشان يدفع عني
انا هنا لو كان في عندي عقل راح عقلي
هدا اللي ناقص الناس تدفع عني
قمت بكل شجاعة حكيت للسواق بعد صمت طويل لو سمحت وقف عنددددددك
ونزلت بنص الشارع وطبعا ما اخدت العشرة شيكل
وفجأة وانا بمشي لقيت اشي بنحدف عليا
طلع السواق راميلي العشرة شيكل بوشي
انا كملت مشي وما اخدتها لانه صعب الاقيها ومابدي اضيع وقت وانا بدور عليها لاني بمجرد ما بديت أدور عليها ما لقيتها واكتشفت استحالة الموضوع
بس وين النكته
انه السواق عملي قصة وحدوته مشان اعطيته 10 شيكل فمابالكم لو ركبت مع سواق تاني اعطيه ال100 شيكل اللي معي
طبعا كل هاي الاحداث بتصير معي وانا قاعدة بقول ياريتني ماصحيت بدري وبتنقص محاضرة الساعة 8 اللي شكلي مارح احضرها بعد كل هالبهدلة
المهم ضليت امشي بالشارع ومش لاقية ولا محل فاتح لانه الدنيا كانت بدري كتير
بالاخير اتصلت ع ماما اللي كانت وصلت ع شغلها وخصلت وخليتها ترجع توصلني ع جامعتي
ومن يومها حرّمت أطلع سيارات عن الشارع بصراحة لانها بهدلة وقلة قيمة
واسفة لو طولت عليكم ..
والله يا نور الله يعينك بس معظم طلبه الجامعات بعانوا من نفس المشكله حتى انا بالردن بعاني منها بالباصات بس الواحد لازم يصرف المصاري بالليل او بالدكانه الصبح اذا فاتحات على كل حال...
ردحذفما شاء الله عليكي موضوع رائع
واستمري بالتقدم
هدا رجال قليل الادب ومش محترم وجعان وما عند احترام للناس علشان شيكل بيعمل كل هدا وانتى احسن اشى عملتيه انك ما كملتى معاه بعدين انتى بنت يمكن كان لطيف شو فى مسباتو مرة كنت طالع على الكلية وركب شاب معى ما معو فكة بردو بهدلو وقل قيمتو كلام كبي والسيارة فيها طالبات من نفس الكلية وجهو صار احمر من الخجل فقام قلو اخصم عن كل يلى فى السيارة علشان تعرف انو الفلوس ما بتهمنى يا جعان ما بنقدر نقول الا الله يسامحو
ردحذفوالله موقف مش حلو وصار معي اكتير ومن ويمها صرت اسئل الشوفير ازا معو فكه او لا
ردحذفوالاهم من هيك انو ما لازم نبني حياتنا على الاستثناءات يعني هاد عينه واشي طبيعي يكون بعض الناس عديمين فهم
وموقفك كان مزبوط وما فيه اشي
المهم ما نعمم على كل الناس
انا كنت هاقولك انو تحولي الكومنت الي كتبتيه عندي لتدوينة لأنو فعلا موقف بيستاهل ينحكى :p
ردحذفطب وبعدين ! قبل فترة صغيرة كنت بعتبر انو فئة السواقين اساسا معاهم كل الفكة الي في البلد! اذا كان هما كمان عندهم ازمة يبقى فعلا الموضوع فيه إن كبيرة كمان
هي هيك دائما مصادفات الحياة..
ردحذفيوم ما يكون معك فكة ،، بيكون السوّاق اله خاطر يكب الفكة من كترهااا
ويووم ما يكون معاااكي ريحة الفكة ،، ابييجي سوااق يتفلسف عليكي زي هييك !!
بيعين الله
كلهاا 15 سنة وأسعار السيارات ابترخص
هههههههههههههههههه حبيبتي يا نووور شو اتبهدلتي ع الآخر
ردحذفيعني ما بدك تدفعي الشيكل .. بلا منها هالحركات هههههههههههههههه
وهاي راحت عليكي ال 10 شيكل كلها يا حيانة الله هههههههه
والله شي بحط العقل بالكف .. بفكروا كل الناس واحد
حبيبتي والله موقفك لا تحسدي عليه أبدا .. أنا لو مكانك بقعد في مكاني و بضل أعيط لأقول يا كافي
وللللللللللل
ردحذف10 مهي بالاصل مش بلغ كبير انا لو كنت معك في السيارة لبهدلت السواق ومسحت بكرامتة الارض