بما إني الي فترة مش كاتبة اشي بالمدونة فاسمحولي أكتب قصة طويلة عريضة رح تزهقكم وانتو بتقرؤوها ورح احكي بالعامية هلئيت يا جماعة الخير وأنا صغيرة لمن كنت بإعدادي كان في فار في بيتنا آه لحظة فهمت والله فهمت انتي بتحكي عن العصفور إيش دخل الفار بالنص معلش يا جماعة اتحملوني صحيح أنا بحكي عن العصفور بس جاي ع بالي قبل ما أحكي عن العصفور أحكيلكم عن هالفار المسكين وبعدها نرجع للعصفور اتحملوني ولو مش جاي ع بالكم تسمعوني ممكن تسكروا الصفحة يعني مش قضية !!
نرجع تاني .. حكيتلكم كان في عندي فار هههه قصدي كان في بالدار عنا فار عاد يعني ما تحسسوني انو عمروا ما كان في فيران في بيتكم أمر طبيعي .. المهم !!
الفار الأفندي عامل إزعاج في البيت والقرار اللي لازم يتم تنفيذه هو قتل هذا الفأر اللعين إلى الأبد طبعاً أنا لو شفت فار قدامي بكش بدني وبقرف وبصرخ وبخاف وإلخ ولكن بنفس الوقت مش مستعدة أتقبل فكرة انو احنا نقتل الفار وفي أكتر من حل ممكن نتخلص منو فيه بس ليش نقتله يعني ليش الأذى ؟؟ ليش ما نحس بشعوره وهي بتيجي عصاية المكنسة عليه اول مرة مش هو كائن حي طيب مش هو بيتوجع ليش ما نرحمه ؟؟
اهلي عملوا مصيدة وفعلا الفار وقع بالمصيدة وبما انو وقع بالمصيدة قرروا انهم بدهم يقتلوه وهنا بدأ دوري البطولي في إني أحافظ على حياة هادا الفار !
صرت أعيط وأحكيلهم ممنوع حد يقتله ولا يقرب عليه وقدامكم كتير حلول
أول حل انه ممكن تجيبوا كيس أسود تحطوه فيه وتخرقوله شوية مشان يتنفس وبعدين تآخدوه بالسيارة وتحطوه عند البحر وتفتحوا الكيس الاسود وتخلوه يروح بحال سبيله بالشارع اللي قبال البحر
الحل التاني إنكم تاخدوا بالمصدية وتحطوا باي مكان وتسيبوه بحاله المهم انه ما تقتلوه
وكل يوم كنت أدخل على الفار اللي موجود وأنا بدني مكشوششش ع الآخر وأحطله شوية أكل ،، وأنا مش متحملة حالي من القرف بصراحة بس هذا ما بعني أنو لازم هادا الكائن يموت ..
طبعاً اول اشي كنت اعمله بس أروح من المدرسة إني أجري على مكان الفار وأطمن انه مش قاتلينه طبعاً أهلي سايروني يومين تقريباً مشان يتقيوا شر النكد اللي رح اعمله لو عرفت انه الفار مقتول وبعدها وفي يوم من الايام رجعت من المدرسة مسرعة اطمن ع الفار المسكين وما لقيته وهاتك يا عياط وقلبتها مناحة رسمية في الدار وانجنيت انو كيف تقتلوا الفااااااار طيب ليش ؟؟ والله حرام عليكم وقوبل هذا باستهزاء شديد من الآخرين على كل حال هالحكي الو اكتر من 11 سنة تقريباً
نرجع للعصفور الغلبان بس ما تقلقوا مافي حد قتله :)
هلئيت جابوا هلي عصفورين وانا كان نفسي أطلق سراحهم انووو ليش ينحبس بقفص والله انه زهق يعني حراااام نخليه محبوس وع فكرة أول اشي عملوا اهلي انهم وصوني إصحك تفتحيلهم القصف وتطلعيهم مجنونة وبتعمليهم ع اساس اني قلبي ما بتحمل هادا الظلم ضد الكائنات الأخرى وعموماً كل يوم كنت اتفرج ع العصفور وأتأمله واراقبه واتمنى لو اني اطيره ويوم ورا يوم وهالامنية تكبر بس مش قادرة انفذها خفت انو اموتو لو طار لانو مش متعود
وفي يوم من ذات الايام رحت اشوف العصفور فاكتشفت انو العصفور مات .. وقتها انصدمت وحسيت بالذنب مابعرف ليش .. كان نفسي يطلع ويشوف الدنيا كيف برا ! بس ما الو نصيب .. العصفور مات والفار مات وما قدرت انقذهم بس في وقت من الاوقات قدرت انقذ نملة من رجلين اخي الصغير وكسبت المعركة بفضل الله بس بحكيلكم مغامراتي مع النمل في تدوينة تانية ..
)
