الخميس، 15 يوليو 2010

أي والله لتاكل !!


اثناء عملي قبل حوالي 4 سنوات التقيت بصحفيتين فرنسيتين كانوا جايين عنا بيعملوا تحقيق صحفي لمجلة فرنسية وكنت معهم حوالي اسبوع كامل وعنجد كتير كانوا رائعين وكانت واحدة منهم من اصول جزائرية مسلمة بس للاسف مابتعرف شيء عن الاسلام ولا عن اللغة العربية
في احد الايام كنا رايحين على بيت احد اهالي الشهداء وكان وقت ضهر تقريباً واهل البيت ناس بسيطين وعلى قد حالهم وكانوا حاطين الاكل وعم بتغدو وقت ما وصلنا عليهم
كانوا الناس قاعدين ع الارض وحاطين صينية الاكل وكلهم حوالي 10 بياكلوا منها مباشرةً
بس دخلنا الناس حكولنا تفضلوا ..
عادة العربي بس تحكيلو تفضل كول اول جملة لازم يحكيها لا شكرا انا شبعان مو قادر اكل يسلمو
بعدين لازم تحكيله لالا تفضل مشان خاطري
برد عليك بحكيلك لالا مش قادر صدقني
برجع بحكيله يا ابن الحلال بس لقمة مشاني
بحكيله بس مشانك رح اكل لقمة واحدة
وبقعدوا نص ساعة يتعازموا
بس لما حكولنا الجماعة تفضلوا كلو معنا الاجانب اللي معي ما كان عندهم اي مشكلة بالعكس راحوا وقعدوا معهم وأكلوا
مع اني انا بصراحة ما قدرت آكل في هيك موقف مو لشي بس مابقدر اكل بصحن جماعي مع الكل والكل بياكل من نفس الصحن
بس وقتها هادا الموقف خلاني افكر كتير منيح بالفرق بين تفكيرنا العربي وتفكير الاجانب ..

الأربعاء، 14 يوليو 2010

موقف بايخ

كنت بدي أروح ع الجامعه وكان عندي محاضرة ع الساعة 8 وكنت حاسة حالي عاملة إنجاز وطني وتاريخي اني صاحية بدري مشان اروح ألحق محاضرة الساعة 8
كالعادة وقبل ما أطلع من البيت بفتش بالمحفظة مشان أتأكد شو في معي مصاري مشان ما اوقع بحرج
المهم فتحت لقيت معي 10 شيكل ماسك و100 شيكل ماسك
قلت يعني ان شاء الله تكون بسيطة ويكون السواق معه فكة من مبارح
وقفت ع اقرب مكان جمب البيت مشان أركب منه
اول سيارة اجت حكتله مفترق الصناعة حكالي لاء وراح
التانية مشيت والتالتة زبطت معي وركبت
كان قاعد قدام جمب السواق شاب وجمبي بنتين
قلت بعقلي معه 3 يعني اكيد دافعين كل واحد اقل اشي شيكل ويمكن يكون معه 5 شيكل من الاصل وشيكل نسي يعطيه لابنه مصروف يعني هي 9 شيكل باقي العشرة اللي حعطي ياها
المهم طلعت العشرة شيكل وبكل ثقة الدنيا حكتله تفضل
السواق اطلع فيا نظرة غريبة عجيبة وصار يبهدل ويعلي صوته ويحكيلي انا فاهم هاي الحركات
انا انصدمت بقول بعقلي حركات ايش يعني !!
حكالي قوليلي بدكيش تدفعي مش تعطيني عشرة شيكل من وين بدي أجيبلك فكة وصار يحكي كلامي يمين وشمال وكل شوية يزيد علي صوته
وفجأة شفت الشاب اللي قاعد قدام بطلع من جيبه شيكل مشان يدفع عني
انا هنا لو كان في عندي عقل راح عقلي
هدا اللي ناقص الناس تدفع عني
قمت بكل شجاعة حكيت للسواق بعد صمت طويل لو سمحت وقف عنددددددك
ونزلت بنص الشارع وطبعا ما اخدت العشرة شيكل
وفجأة وانا بمشي لقيت اشي بنحدف عليا
طلع السواق راميلي العشرة شيكل بوشي
انا كملت مشي وما اخدتها لانه صعب الاقيها ومابدي اضيع وقت وانا بدور عليها لاني بمجرد ما بديت أدور عليها ما لقيتها واكتشفت استحالة الموضوع
بس وين النكته
انه السواق عملي قصة وحدوته مشان اعطيته 10 شيكل فمابالكم لو ركبت مع سواق تاني اعطيه ال100 شيكل اللي معي
طبعا كل هاي الاحداث بتصير معي وانا قاعدة بقول ياريتني ماصحيت بدري وبتنقص محاضرة الساعة 8 اللي شكلي مارح احضرها بعد كل هالبهدلة
المهم ضليت امشي بالشارع ومش لاقية ولا محل فاتح لانه الدنيا كانت بدري كتير
بالاخير اتصلت ع ماما اللي كانت وصلت ع شغلها وخصلت وخليتها ترجع توصلني ع جامعتي
ومن يومها حرّمت أطلع سيارات عن الشارع بصراحة لانها بهدلة وقلة قيمة
واسفة لو طولت عليكم ..